மூன்றாவது நிழல்

​என் காதலனின்

இறந்து போன முன்னாள் காதலி

தன் இருப்பை

உணர்த்திக் கொண்டே இருக்கிறாள்

உணவில் அதீதமாய் கலந்து விட்ட

பிரித்து விட முடியாத உப்பைப் போல்.

வேலமரப் பூக்களில் – அவள்

ஒரு பட்டாம்பூச்சியென அமர்ந்து

மிதந்து செல்லும் போது

அவளென்று அறியாது

அவளைப் பிடிக்க கை உயர்த்துகிறான்.

ஒரு புலரியின் கூடலில்

மேற்கூரையில் மங்கலாய்த் தெரியும்

மூன்றாவது நிழல் யாருடையது?

செனெவில்லின் பியானோ இசை

மனதின் உச்சஸ்தாயிற்குச் சென்று கீழிறங்குகையில்

அவனை அணைத்துக் கொள்கிறேன்

அப்பொழுது

அவளையும் சேர்த்தே தான் அணைக்கிறேன்.