கையறு துளிகள்

நீல ஒளி ஆக்கிரமித்திருக்கும் உன் அறையில்

​யாருமற்ற ஒரு விளையாட்டுத் திடலின்

பார்வையாளனைப் போல் அமர்ந்திருக்கிறேன்.

இப்பொன்னிற மதுவை அருந்துவது

சூரிய வெளிச்சத்தை உட்கொள்வது போலெனக்

கபடமிலாப் புன்னகையுடன் நைச்சியமாய்த் தூண்டுகிறாய்.

ஐஸ் துண்டங்களின் சில்லிட்ட பரப்பின் மேல்

அழுத்தமாய் உறைந்திருக்கிறது என் மோகம்.

கண்காணிப்புச் சிறிது தளர்ந்த பொழுதில்

திரைச்சீலைகள் பின்னிருந்து நெளிகின்றன

ஒளிக்கப்பட்ட நம் வரையறையற்ற ஆசைகள்.

உன் கைகளில் நிரம்பியபடி இருக்கும்

வெளிப்புறம் வியர்த்த கண்ணாடிக் குவளையினுள்

மெதுவாய் உருகத் துவங்குகின்றன ஐஸ்கட்டிகள்.

நீ துளித் துளியாய் அருந்திக் கொண்டிருப்பது

மதுவை மட்டும் அல்ல என்கிறாய்.

பற்றவைக்கப்படாத சிகரெட் ஒன்று

முறுக்கேறும் என் நரம்புகளுக்குள்

வன்மமாயப் புகைந்து செல்கிறது.