ஜதி

​அடுக்குமாடிக் கட்டிடத்தின்

மூன்றாம் தளக் குடியிருப்பில்

தட்டப்படும் நட்டுவாங்கம்

தாளம் தப்பாது ஒலிக்கின்றது.

இரண்டாம் தளத்தில் வசித்தவள்

தூக்கிலிட்டுக் கொண்ட மின்விசிறி

மின்சாரம் திரும்பியதும்

குறைந்த விசையில் சுழல்வதும்

அணைந்ததும்

சட்டென்று நிற்பதுமாய் இருக்கிறது.

கடிகைச் சுற்று திசையிலும் – பின்

எதிர் இடஞ்சுழியிலும் சுழன்று

ஜதிக்கேற்ப ஆடுகிறது அவள் உடல்

தையா தா ஹா..