என்ன செய்ய?

 ஒரு கசந்த கோப்பை பானமென

பருகுகிறேன் இந்த நெடிய இரவை

துளியாக துளித் துளியாக

வைக்கப்பட்ட ஒரு நம்பிக்கையின் இழப்பு

ஒரு பசிய துரோகத்தின் வலி

எல்லாவற்றயும் அர்த்தமற்றதாக்கி விடுகிறது

வாழ்வின் சமன்பாடுகளை

பின்னிரவின் அமைதியை

எல்லாவற்றையும். . .

மழையில் நனைந்த ஈசலிறகுகள்

சிறிதே அசைந்து இடம் மாறுகின்றன

தனித்தெரியும் தெரு விளக்கின்

மெல்லிய மஞ்சள் வெளிச்சத்தில்

சாம்பலென புலரும் வைகறையிலும்

இன்னும் மீதமிருக்கிறது

நாவின் சுவை அரும்புகளில்

விழுங்கவே முடியாததொரு கசப்பு